قصيدة زنازين الحياه كلمات الشاعر الكبير / رضا أبو الغيط

قصيدة زنازين الحياه
كلمات / رضا أبو الغيط
********************
لما صاب الشمس يوم داء الكسوف
صابنى خوف..........................
بس حاجه جوه منى .................
صوتها قالى : - (الله رؤوف )
ابتديت اجمع شتات..................
الولاد ويا البنات.........................
وابتدينا وسط ضلمه نلضم الحلم بأملنا
غصب عن كل الظروف..................
وابتدينا سكه كانت
صعب جدا نمشى فيها
وإلتقينا الدنيا هانت ع اللى عاش العمر ليها
والشجر واقف بيبكى للفروع اللى بتمسح
دمعه نازله من عينيها
ع اللى كان دايما زاينها واللى كان دايما كاسيها
والورق ع الا رض ساكن
لونه داكن
م اللى داسه وسط ناسه جوه اسوار المدينه
وإلتقينا المعطيات والرموز ف الكراسات
كلها بتقول حرام
تمشوا سكه
اللى حاول يبتديها واللى حاول يمشى فيها
قبل منكوا...... فيها مات
رغم كل التحذيرات
قولنا نمشى فيها برضو
هى موته ولا أكتر
طولها والله زى عرضه
وابتدت احلامنا تسبق كل انواع الخطاوى
والقلوب تعزف وتنشد كل ألوان الغناوى
والأمل جوانا يكبر
كل يوم أكتر وأكتر
كل م بنسمع أدان
كل م ندوس اللى خان
كل م بنمسح بإيدنا ف الضباب
اللى خبى الشمس عنا
غصب عنا
اللى هانها واللى هنا
اللى سارق فرحه طارحه جوه دارنا
اللى حابس نور نهارنا
جوه زنزانة الحياه
والأمل جوانا زاد
نلقى ف الدنيا دي زاد
للولاد السهرانين
فوق هضاب الجوع بتحلم بالطعام
فوق تلال الخوف بتحلم بالسلام
لما شوفنا الشمس جايه من بعيد
وف ايديها شايله لينا
الف عيد