للأسف بغبغان / السيد محمد صابر

ياللى انت بتصور حياتى بالدمار
وكنت عايش فى قلبى
لكن بإنكسار
والإهانة هى اسلوب الحوار
عندى ليك كلمة مرة لكن ها قولها
لوأنت ثائر
أو مناضل ومش جبان
صاحب كرامة
ومش هترضى يا أبني تانى بالهوان
بلاش تردد كلام بيهدم
.. بغبغان
وخليك مصابر وبلاش تكابر
دى مصر جنة بالأمان
كل أولادها بيعشقوها
بيحلموا الحلم الجميل
بيعملوا للمستحيل
بس الحكاية مش شعار
هى الكرامة ليك لوحدك
ولا الكرامة كمان لبلدك
الكرامة فى احترامك
واحترامى
مش لفرد مش بتعرف فى الاسامى
الكرامة اسلوب حياه
لابكلامك ولا بكلامى
مش بطوبة او بتهمة بالخيانة
مش بولعة او بتفجير أو بقتل
الكرامة إنى أحافظ على اللى ليا
الكرامة أنى أعمل إللى عليا
أنى أبنى وأزرع وأعمر
مش أهتف وأكسر وأدمر
الكرامة إنى أكون وتكون معايا
أن صوتك يبقى نغمة لصوت غنايا
إن إيدك ويا إدها وإيد أخوها
ترفعوا كرامتى راية
الكرامة تحب بلدك
وتنسى نفسك
ولا أقولك خلاص كفاية