الشمس طاله ف المدي /رضا أبو الغيط

الشمس طاله ف المدي
وف حضنها نور الصباح
وهدفها تسعد أفئده
داقت عذاب ألم الجراح
وشعاعها واقف يبتسم
فوق فرع أخضر ع الشجر
وبتغسله نقطة مطر
طول عمرها عاشقه البراح
والإرتياح
ساكن جميع الأورده
والفضفضه طرحت.صدا
طال السما من فرحته
بقدوم نهار لون الخضار
ووداع زمان الإنبطاح
من فرحتي
بالشمس اللي طلت م السما
متبسمه
قلبي انشرح
والأرض رقصت م الفرح
ولقيتها طايره ف الفضا
من غير جناح
وبتحضن النجمه اللي مالت ع القمر
وتقول لها
آن السهر.....حتي الصباح
دقي دفوفك واعلني
موت السراب والاغتراب
اليوم ده طلت ع البشر
الشمس فوق خد الشجر
والديك بيعزف ع الوتر
ألحان السعاده من جديد
دقي دفوفك وافرحي
اليوم ده عيد
كل الأماني ف قلبنا والإرتياح
*********************
رضا أبو الغيط