ابن الوطن ــــ ــــ بقلم الشاعر قطب صلاح رمضان الشريف

ابن الوطن
ــــ
ابن الوطن بينادي
إصحي يا أهل بلادي
ثورتنا ليه بتضيع
والدم ع الأيادي
..
ليه نعيش الضياع
ليه الأمل يتباع
في كل سكه وسوق
بكلام كدوب خدّاع
..
من حلمنا صحونا
كاس الوجع وسقونا
وبالرصاص ورمونا
فوق الضياع بنموت
..
وبين مسا وصباح
ودموع قلوب وجراح
الظلم أصبح ليل
دايس على الأرواح
..
فتحوا الخزن لموه
دهب الجدود وخدوه
وسلاح لنا وباعوه
نضرب في بعضينا
..
صرخت بعلو صوتي
يا بلادي مش هتموتي
روحي وعمري فداكي
ملعون أبوك يا سكوت
ــــ
بقلم
الشاعر قطب صلاح رمضان الشريف